香港天梭觀賞團到訪仁川，行程3日2夜，全程食得好住得豪，仲有得玩！呢日團隊去首爾明洞「血拼」，上頭指示叫小弟跟住去，事關做咗咁多日賽事，想搵啲市面氣氛嘢拍吓，仲有小弟太座嘅奪命追魂Call要我買「蛇毒金箔面膜」，聽到個名都嚇死，老婆，妳唔係撻啲咁嘢喺塊臉度呀！
明洞係港人遊南韓必去嘅旅遊熱點，天梭觀賞團嘅女士更係熟晒門路，高呼一聲：「我哋去樂天百貨9樓，記住，係9樓，大家上啊！」然後就好似盟軍登陸戰咁不斷向前推進。去到化妝品部放眼望落去，簡直係一個戰場，女士們雙目放光，因為據講啲化妝品好平好抵，男士們就恍如戰俘，冇厘精神。至於太座要我買啲咁複雜嘢，結果當然係任務失敗，因為嗰度有蛇毒就冇金箔，有金箔就冇蛇毒，同行團友叫我咪亂買，因為如果唔啱用，幾貴嘅面膜都係垃圾。
南韓百貨公司咁熱鬧，建議亞運會增設示範項目「血拼」，呢塊金牌嘅含金量絕對爆標。
馬田＠仁川