經常聽到人講，亞運會即係「太公分豬肉」，亦係各國地區體育資源分配嘅重要指標，所以亞運會亦冇奧運會咁嚴格，比賽項目同獎牌數目盡量攞多啲出來畀大家分，各取所需。
今屆仁川亞運共有36個大項，總共有439面金牌，情況類似每年年尾嗰啲樂壇頒獎禮，中日韓傳統三強就係最佳男歌手同女歌手，鬥攞得多獎，其他國家就係二線歌手，鬥搶其餘獎項。
大家對樂壇「豬肉獎」感到麻木，但畢竟體壇並非樂壇，亞運會仍帶畀參賽各國無窮歡樂與憧憬，例如小弟採訪亞運男足小組賽最後一場香港對孟加拉，由於香港和波都出線，到場採訪人員唔多，但孟加拉就犀利喇，該國傳媒逼滿成架巴士，直情好似做節咁。
聽番孟加拉個教練講，雖然球隊最終出局，但由於球隊在首仗擊敗阿富汗，預計回國會受到英雄式歡迎，而佢哋仲會推出連串改革，即係類似我哋香港「鳳凰計劃」咁樣，所以話，有時一場波戰果，帶來嘅改變可以翻天覆地，呢啲就係體育神聖之處。
馬田＠仁川 亞運手記