歐霸盃附加賽次回合昨晨惡戰連場，結果一晚開出3場「主其他」波膽，包括國際米蘭大勝史達蘭6比0，慕遜加柏喪炒薩拉熱窩7蛋，飛燕諾就以4比3險勝索爾亞，扑得中就認真和味喇。三隊都出線分組賽，但飛燕諾抽籤不利，喺G組遇上衞冕冠軍西維爾、標準列治同列積卡。
兩支英超球隊，只得熱刺清風送爽兩回合計贏AEL利馬素5比1晉級，首次出戰歐洲賽嘅侯城雖喺主場以2比1小勝洛格倫，但兩回合計踢和2比2，因作客入球不及對手無緣分組賽。