老虎2億借金變老婦
歐聯日前喺摩納哥完成分組賽抽籤，結果似足TBB嘅劇情，戲碼翻炒又翻炒，好似拜仁慕尼黑鬥曼城、阿仙奴更係4年內第3次喺分組賽同多蒙特碰頭，冇乜睇頭，反而歐洲各大豪門巨頭嚟到摩納哥爭逐法卡奧同卡雲尼兩大法甲巨星嘅暗戰更加好睇，皇馬同巴黎聖日耳門（PSG）老細被踢爆密會傾卡雲尼轉會，而祖雲達斯話事人亦同法卡奧經理人會面，有望以破世界紀錄借用費2,000萬歐元（約2億港元），將「老虎」變成「老婦」！
今屆歐聯抽籤勁多翻炒對決，車路士再同史浩克04同組，阿仙奴又遇上「老朋友」多蒙特，更加出現曼城、拜仁同莫斯科中央陸軍繼上年後，又被抽中身處死亡E組嘅奇景，最弊係仲多咗隊羅馬，四隊呢鋪為出線更會爭餐死。
C朗攞最佳寸爆紅軍
重返歐聯嘅利物浦反而抽到上籤，出線最大勁敵只係皇馬，兩軍對上一次交手已係09年，紅軍兩回合計大炒皇馬5比0，今次再遇剋星，C朗拿度豪言：「有我喺度未驚過！」C朗係得戚得起嘅，歐洲足協喺抽籤後舉行頒獎禮，C朗成功擊敗拜仁雙星紐亞及洛賓首奪最佳球員獎，但由於佢未夠Fit，落選9月7日歐國盃外圍賽對阿爾巴尼亞嘅葡萄牙大軍！
皇馬喺足智彩以4倍成奪冠大熱，雖然「銀河艦隊」已夠晒星光熠熠，但佢哋睇嚟仲未肯中止「摘星計劃」，有西媒公開會長皮里茲同PSG主席密會嘅相，指出皇馬想打卡雲尼同馬高華拉堤嘅主意。一直同皇馬扯上關係嘅「老虎」法卡奧就可能畀摩納哥借去「老婦人」祖雲達斯，即使借用費高達2,000萬歐元，祖記仍志在必得，有意媒大爆抽籤前，祖記經理馬羅塔同法卡奧經理人密會2個半鐘，唔通「老虎」真係會峰迴路轉成為「老婦」？