獨食高比轉性打防守
【Billy上海直擊】正在上海訪問的NBA湖人巨星高比拜仁（Kobe Bryant）出名「獨食」，而從不考慮減薪幫球隊重建的「小飛俠」，亦被批評錢字大過天，不過，昨天他就一反常態，除了罕有地指導一眾籃球小將「打防守」之外，又表示退役後無意在NBA執教鞭，寧願教小朋友打波好過，突然變得唔貪錢兼打防守，實在「估佢唔到」!
作為「NIKE Rise Challenge」第2階段選拔的超級嘉賓，高比拜仁昨日繼續於上海江灣體育館落場指導後輩，並接受傳媒訪問。被問到退役後會否成為NBA教練，高比耍手擰頭稱：「做教練冇問題，但一定唔會喺ＮＢＡ教，我寧願周圍教吓小朋友打波好過！」打法出名獨食的高比，更罕有地大談防守經：「新季湖人首要條件係改善防守，防守籃板同緊迫性防守做得好唔好係成功關鍵。」
公開個人步法要訣
坦言享受晚晚4點鐘起床練波的高比，新季將全面復出，並期待與新隊友林書豪（Jeremy Lin）及布沙（Carlos Boozer）合作。可能仍未適應時差，昨日高比於早上11時登場後明顯睡眼惺忪，但他很快就 「撻着」，不單止落手落腳執靚30位Rise Challenge參賽者的背籃功及防守動作，對於一班後輩的籃球疑問更有問必答，並公開其步法要訣，參賽者肯定獲益良多。
高比表示對亞洲新一代球員另眼相看：「亞洲球員水平近年已同國際球員拉近咗好多，對抗性明顯強咗，但技術仲有進步空間。」高比會於上海出席多3課Rise Challenge訓練營，並揀選10位幸運兒進入第3階段選拔。