兵分四路上山下海

Route1：伊巴謙莫域 見李小龍即快閃

PSG最閃巨星伊巴謙莫域早上去咗尖東海旁散步，同行尚有隊友蘇馬拉卡馬拉及戴奧，身材高大的「呂布」加上幾名貼身保鏢包圍出巡，一度引起哄動，途人爭相圍觀。

維港船河全程耷頭

不過，伊巴喺炎日下只係戴住耳機專心聽歌，有自由行認出佢，大聲嗌佢都冇反應。擁有跆拳道黑帶的伊巴謙行到星光大道李小龍銅像前，以為佢會觀賞一番，點知佢企咗幾秒就閃人返上旅遊巴，認真估佢唔到。

遊船河期間，伊巴謙背窗而坐，無心欣賞維港景色。	馬昆奴斯哥利亞（左）同杜捷斯對山頂纜車好有興趣。	呢位梁小朋友獲查杜美親筆簽名足球，認真Lucky。

接住佢又喺文化中心碼頭登上「張保仔」號帆船，3位球星步入船艙後立即要求船長折返紅磡酒店，船程大約10分鐘，期間伊巴謙繼續耷頭思考，蘇馬拉卡馬拉及戴奧則有傾有講，船程話咁快就到，3人快步返酒店，草草結束呢次維港遊。

雲達韋爾手忙腳亂，連後面位師傅都陰陰嘴笑。	上完堂品嘗番自己嘅傑作，唔知味道好何？	3位球星都好畀心機跟陳師傅（右）學嘢！

據安排今次活動嘅單位表示，PSG亞洲行主要是季前集訓及爭奪法冠盃，遊覽活動只得周二上晝，大軍周三到北京後唔會再有遊覽活動，希望球員滿意今次安排。

Route2：馬昆奴斯 上山頂與眾同樂

「山頂嘅朋友，你哋好！」難得嚟到香港，梗係要上山頂欣賞風景啦！馬昆奴斯哥利亞、查杜美及杜捷斯3位PSG球星就踩上山頂，俯瞰香港景色之餘，仲喺太平山上踢波，大騷腳法添！

馬昆奴斯哥利亞、查杜美等人早上約10時從酒店出發，經過半小時車程後終於抵達山頂。三子對於山頂景色相當好奇，馬昆奴斯哥利亞更不時用手機拍下香港景色。三子之後步行到觀景台時突然攞出個足球，仲即場大晒腳法，鬼馬嘅馬昆奴斯哥利亞更作狀將足球大腳省落山，認真曳曳，早上時分山頂已有不少遊客，佢哋嘅出現即時引來球迷圍觀，三子更邀請一名梁姓小朋友齊齊玩，馬昆奴斯哥利亞隨後更向佢送上簽名足球添！

遇法國遊客被集郵

三子名氣雖然唔及伊巴謙莫域，不過佢哋剛巧遇上一班來自法國嘅遊客，隨即被「集郵」，佢哋亦相當識做，合照全冇托手（月爭）。喺觀景台逗留咗一陣就去咗凌霄閣參觀，又喺山頂纜車前留影，之後起程返酒店休息。

Route3：雲達韋爾 雞手鴨腳整拉麵

成班隊友出晒去蒲，但雲達韋爾同安根達等3名球星竟然留守酒店沒出去，唔通真係咁乖仔？原來佢哋另有好節目，之唔係去學整拉麵囉！大家咪以為整拉麵好易，對從來冇入過廚房嘅佢哋，簡直係大工程！加上同師傅言語不通下令整麵過程更加搞笑。

揸筷子笑料百出

開始製麵師傅示範搓麵糰、拉麵條時，雲達韋爾同隊友都畀佢高超嘅技術嚇得目瞪口呆，梗係啦！師傅每日整麵嘅時間，可能仲多過佢哋練波。之後三人親自體驗製麵，個個「姐手姐腳」，兩隻手黐滿晒麵粉，但睇表情佢哋玩得好開心。

辛苦完一大輪，梗係唔少得試食番自己落手落腳嘅拉麵啦，睇住佢哋幾個學揸筷子，真係笑料百出，三子之中以雲達韋爾最叻，佢解釋：「其實我好鍾意中國菜o架，喺法國我都經常幫襯中國餐廳，但平日冇乜下廚，但經過今次拉麵體驗後，相信之後有機會都會再嘗試烹飪。」

Route4：柏斯托尼 太極張三豐上身

同樣冇離開酒店嘅仲有阿根廷球星柏斯托尼，原來佢帶咗兩位「小師弟」巴貝克及祖安奇雲，分別穿起代表法國國旗嘅紅白藍三色唐裝，齊齊殺到酒店天台「上堂」，學習太極。負責指導的陳師傅過往雖曾教過香港金融管理局總裁陳德霖，指導外國球星卻係第一次。

落堂教番師傅的波

不過，陳師傅昨日「授徒」時以動作配合簡單英語教導，認真學習嘅PSG三子好快就「太極張三豐上身」，耍起大極拳時個個有板有眼，似乎堅有天分。

作為「大佬」嘅柏斯托尼非常「識做」，「落堂」後即拿起足球教師傅「的波」，氹得陳師傅開懷大笑！呢位阿根廷球星坦言學太極就好似「發現新大陸」，新奇之餘更非常享受：「可以嘗試新事物實在非常開心，我覺得耍太極需要極度集中精神先至能夠做得好，呢一課雖然好短暫，但我卻非常享受！」講到來季目標，他則稱：「希望可以衞冕法甲，也希望在歐聯踢出好成績。」