昨晚表演賽一共製造了8個「士哥」，名符其實是一場入球騷，觀眾睇得過癮，而踢足87分鐘嘅林嘉緯，就覺得「學到好多嘢」，只係慘食檸檬換唔到柏斯托尼件波衫，有點冇癮。同時，大會公布入場觀眾人數17,153人（購票人數15,306），票房收入達6,920,720萬港元。
傑志中場林嘉緯對於能與法甲高手過招，即使最終落敗，但仍覺得「賺」了很多：「PSG真係好強，比起以往對過嘅阿仙奴或曼聯更認真，賽前我隊嘅部署本來是想壓逼對手，但唔成功，總結成場波，我就覺得學到好多嘢，對備戰亞協盃好有幫助。」傑志將於亞協盃8強硬撼越南寧平凱撒水泥，先於8月19日作客，再於26日主場再交鋒。
賽後客軍悍將柏斯托尼留下為部分球迷簽名，群情洶湧，他最後更將波衫掟上觀眾席「益」幸運球迷，非常識做！但原來林嘉緯一早想與柏斯托尼換波衫，不過慘被拒絕，當嘉緯知道心愛嘅波衫最後被掟上看台，只有無奈回應一句：「吓！係咩？」至於伊巴謙莫域賽後捉住門將雞啄唔斷，似是檢討賽事，態度十分認真。
對於入場數字不足2萬人，傑志總領隊伍健坦言有點失望，而球會亦要「蝕少少」，並謂以往搞英超球隊，球迷就嘈唔夠飛，但今次邀請法國冠軍就這麼少人，但整體上都算成功，能為傑志中心籌款。