伊巴謙轟3粒fans過足癮

雖然天氣濕熱，但無減伊巴謙莫域（右）的拚搏精神。

歷史性訪港嘅PSG，雖然昨晨分開幾路大軍走訪香港各地，惟晚上依然強陣出擊，除了隊長伊巴謙莫域之外，莫達、馬高華拉堤及沙華托尼施利古等國腳級主力皆正選上陣，同時，烏拉圭射手卡雲尼縱未列入後備名單，但仍隨隊友坐上後備席，與香港球迷見面。

過去對曼聯及阿仙奴都有不俗演出嘅傑志，開賽僅5分鐘已趁對手陣腳未穩，由巴倫古素喺無人看管下接應佐迪傳中，頭槌輕易頂破意大利國腳沙華托尼施利古十指關，為傑志開紀錄，可惜主隊只開心了7分鐘，便被安根達右路勁射破網追成1比1平手。

現場不少女球迷都係專誠嚟捧伊巴謙莫域場。	傑志門將王展鵬送禮，造就伊巴謙近門輕鬆又建一功。	伊巴謙以隊長身份登場，貢獻3入球1助攻，踢足77分鐘至被換走，絕冇欺場。

左右腳加頭槌入球騷

一舉手一投足皆牽動全場球迷情緒嘅伊巴謙莫域，明顯因不適應炎熱天氣，7分鐘已開始叉腰，全場亦走動不多。不過多得主隊守衞送禮，在上半場餘下時間成為主角。23分鐘傑志後防位置界外球失誤，伊巴謙莫域突破越位陷阱傳入中路，巴希碧克控定射破王振鵬大門，迅即反先2比1。25分鐘王振鵬再度送禮，喺後場心臟地帶傳球畀伊巴謙偷甩，再巧妙挑過王振鵬射入空門，PSG領先到3比1。3分鐘後呢位瑞典神鋒接應隊友地波傳送，近門撞射又得手，個人梅開二度助客軍遙遙領先4比1。PSG在短短5分鐘內連入3球，入球騷令球迷睇到如痴如醉，未完半場已大玩人浪。

換邊後聖日耳門繼續以原陣應戰，繼續向傑志兩閘位置埋手。巴貝克58分鐘射近柱而入，令主隊第5度失守；身高1米95的伊巴謙莫域於73分鐘盡展高空優勢，在兩名傑志守衞夾擊下仍接應傳中球頂入，完成帽子戲法並將比分拉開6比1。伊巴謙莫域示範完右腳、左腳及頭槌入波後便功成身退，77分鐘由班博克入替。傑志雖然大比分落後，惟完場前仍憑艾力士不惜氣力搶甩對手腳下球，射成2比6完場，對球迷亦有所交代。