巴塞出10.5億 收留阿蘇
雖然蘇亞雷斯畀國際足協（FIFA）重罰，但巴塞隆拿仍願出8千萬鎊（約10.5億港元）力搶呢位麻煩友，更計劃搞「形象工程」叫佢公開道歉，以洗脫「咬人蘇」污名，阿蘇嘅律師亦去埋巴塞商討大計；同時FIFA因「咬人事件」捱轟，除被球員協會狠批判罰違反人權外，烏拉圭及委內瑞拉政界要人亦聯同球王馬納當拿及烏拉圭領隊泰巴尼斯鬧爆FIFA，呢鋪「蘇神風波」真係有排搞！
西班牙傳媒指巴塞並冇放棄追求身價高達8千萬鎊嘅「咬人蘇」，又傳「地上最強」意圖壓價至5千萬鎊（約6.6億港元），並要求佢公開道歉力求重建形象。不過「哨牙蘇」已經自動波「做嘢」，返抵烏拉圭老家後獲數百名球迷跟到去屋企樓下打氣，深受感動嘅「蘇神」抱住一對仔女走出露台向粉絲揮手致謝，十足一副慈父相。
泰巴尼斯谷氣 辭去FIFA職務
「咬人蘇」繼續獲球壇、甚至政界重要人物力撐，先係國際職業球員協會（FIFPro）發聲明指FIFA嘅判罰「直接侵犯球員工作權利」；馬納當拿亦話：「如果FIFA覺得咁大件事，做咩唔索性將佢送去古巴嘅軍事監獄？」烏拉圭領隊泰巴尼斯更喺例行發布會宣布辭去FIFA嘅一切職務，仲用咗15分鐘不停炮轟FIFA，又怒插英國媒體有心「煮死」阿蘇，最終獲在場記者掌聲送別！
烏總統：「世盃史上永遠嘅恥辱」
烏拉圭總統穆希卡亦公開譴責FIFA，稱處罰係「世盃史上永遠嘅恥辱」，委內瑞拉國民大會主席卡貝羅就話FIFA歧視南美球員：「FIFA覺得咩都係拉丁人嘅錯，但其實喺白禮達領導下，佢哋所傷害嘅人更加多！」家陣各界齊向FIFA施壓，加埋阿蘇嘅私人律師亦已經為咗幫佢打甩「不公判罰」而去到巴塞隆拿，搵埋當地嘅法律專家研究應對方法，話唔定「蘇神」真係翻身有望！