史達寧賣盤離場唔玩 姚明155億做艇主?

美國記者西蒙斯尋日爆料，指曾經効力火箭嘅姚明計劃入主快艇。「小巨人」受訪時大耍太極，但就冇否認收購事宜：「依家太多流言，我冇辦法逐一回應，不過ＮＢＡ正步向國際化，咩嘢都有可能發生。」

或成聯盟史上首位華人班主

雖然姚明承認以現時財力買唔起價值約20億美元（約155億港元）的快艇，但美傳媒話「小巨人」正計劃拉攏財團作出收購。環顧全聯盟，最具影響力嘅華人股東已經要數到湖人黃馨祥，若姚明收購快艇成事，將開創先河成ＮＢＡ史上首位華人班主。

仍然關注ＮＢＡ嘅姚明，同時睇好馬刺可以躋身總決賽。雖然早前盛傳因小腿傷要收咧嘅雷霆前鋒伊巴卡（Serge Ibaka）突然神奇康復並有望候命，不過喺西岸決賽總比數領先2比0嘅馬刺，教練普波維治（Gregg Popovich）就揚言「未驚過」，似乎對聽朝進行嘅Game3胸有成竹。

（now 635周一早上8時30分直播）