史高拉利解除禁慾令！帶領巴西勇奪2002世界盃冠軍嘅主帥史高拉利大開綠燈，准許所有國腳可以喺今夏決賽周期間有正常性生活，不過佢講到明只可以係「正常性愛」，一啲太過激烈或者高難度動作嘅「雜技式性愛」一律免問，睇嚟巴西人嘅床上招式絕對唔簡單，分分鐘拍得住佢哋喺球場上面嘅「倒掛金鈎」、「插花」等絕技！
大菲以往一向唔主張球員喺大賽期間有性生活，以防床事過多搞到腳仔軟，「大哨」朗拿度當年仲因為咁而高呼「忍到細佬痛」，不過時移世易，「大菲」深知一眾森巴兵團天性熱情奔放，強行禁慾隨時帶來反效果，所以決定改變政策玩開放，准許所有國腳喺決賽周期間有「正常」性生活，不過有一附帶條件，就係嚴禁所有「雜技式性愛」：「球員喺世盃期間可以享受性愛，但只能夠以正常同平衡穩定嘅形式，絕唔能夠玩高難度嘅『雜技式』性愛！」大菲仲話準備做份調查報告，以便了解球員嘅性愛習慣。
大菲由始至終都冇解釋何謂「雜技式」，不過講得出口，相信佢對巴西人嘅床上功夫及招式已經心中有數，喺芸芸現役巴西國腳之中，馬些路、丹尼爾、大衞雷斯、羅賓奴畀人印象都係最多鬼主意同最鍾意搗蛋，唔知呢番說話係咪針對佢哋呢？
其實大賽期間使唔使禁慾一向都係領隊需要面對嘅問題，當年巴西國腳羅馬里奧曾經講過，比賽前有一次完美嘅性生活係入波嘅保證，今次大菲呢個決定可能對巴西爭逐世盃有百利而無一害！
曾傳授球迷溝女必殺技，大隻body衝刺力強，曾傳出性生活過多拉傷腿筋。
樣子蠱蠱惑惑，超級百厭星一名，無論球場內外都最鍾意玩埋啲刁鑽嘢。
自名潮流達人，rap歌結他都得，連里奧勒度狄卡比奧舊女友法伊里都追到。