勞証顯，香港首席鐵人，長時間於外地集訓，為的是一面亞運獎牌。性格同我相似，癲癲哋，練習多過乜，搵銀就其次。游水比我慢，不過一上水我就食塵。
以下係我對佢一些Q&A，又同讀者分享吓！
我：三項鐵人對你來說，代表甚麼？
佢：係一種生活模式，因為每日做運動就好似你每日都要刷牙咁，唔可以唔做。
我：你依家係全職鐵人，一日游跑踩加埋百幾公里，你唔悶咩？
佢：你都明！你以前咪又係咁游，enjoy咪得囉！呢個係我生命、生活，所以一日訓練等同充實嘅一天。我目標係今年亞運會可以企上頒獎台，跟住就衝擊2016奧運！
我：如果香港好似外國咁將運動員明星化，你最想成為邊樣產品代言人呢？
佢：我好想係一個長期合作夥伴，好似碧咸咁，一見到佢就知係「A字頭」，令品牌同運動員緊緊掛鈎。呢種支持係無價！
我：除我之外，你最欣賞邊個香港運動員？
佢：你游水游到咁出名，又多才多藝，小弟甘拜下風！老老實實，香港有好多好叻運動員，不過好似你就真係好少！又靚仔，又不羈！
我：我哋識咗幾耐？
佢：識咗有10年喇！嗰時我仲係體院小鐵人嘛，每次比賽游長途都畀你放甩晒！！不過，好彩你跑步好慢，成隻龜咁！
我：最後都要問，假如你冇做運動員，你覺得你依家會做緊咩先？
佢：我都幾肯定我會係一位藝術家，畫吓油畫嗰隻。我真係好鍾意畫畫！
鍾國樑（Alex）
天生運動狂，前亞運游泳香港隊「水霸王」