諾亞帶頭助公牛滅火
昨晨NBA爆發「東岸冠軍前哨戰」，公牛中鋒諾亞（Joakim Noah）於網球名將老竇諾亞（Yannick Noah）的浮誇打氣下，交出「20+12+7」的準三雙數據，帶領球隊加時以95比88滅「火」。而被全場高呼做MVP的諾亞，賽後「唔認叻」指「戴歷羅斯（Derrick Rose）先係MVP」，好波又夠義氣，抵你受歡迎！
公牛昨仗主場出擊一度落後熱火18分之多，不過老諾亞就不停於觀眾席為囝囝瘋狂打氣。當囝囝諾亞於第四節封走熱火比士利（Michael Beasley）的投籃後，該位83年法網盟主更效法「封波狂人」莫湯保（Dikembe Mutombo）的招牌搖手指動作，加上多次激動地與公牛fans激掌均被電視台捕捉，「演出」可以話比熱火三巨頭更搶鏡。
話戴歷羅斯先係MVP
諾亞亦沒有令老竇失望，全場貢獻20分、12個籃板球、7次助攻及5次封波，加上占美畢拿（Jimmy Butler）貼身防守嘜到勒邦占士（LeBron James）僅得34%命中率，最終帶領公牛經過加時後以7分之差贏波。而被全場球迷高呼做MVP的諾亞，賽後表示：「MVP只得一個，佢係戴歷羅斯，同埋我對MVP冇乜興趣，攞冠軍指環先最重要！」