杜蒙特疑發放前度床照
活塞中鋒杜蒙特（Andre Drummond）近期畀前度明星女友Jennette McCurdry大爆「唔識咀嘴」，慘遭「o趙完唱」！杜蒙特其後疑似放Jennette McCurdry床照上網還擊，惹來不少影迷於其twitter留言恐嚇。不過，杜蒙特就澄清冇發放床照，同時指自己不想再與Jennette McCurdry有任何瓜葛。
被嘲吻技差勁淪為笑柄
杜蒙特去年與在美劇《iCarly》成名的Jennette McCurdry「撻着」，但兩人拍拖都唔夠一個月就閃電分手。Jennette McCurdry早前於網上電台節目爆料，指自己從未鍾意過杜蒙特，又嘲笑其接吻技巧奇差，搞到杜蒙特淪為笑柄。不過，網上日前傳出Jennette McCurdry的床上自拍照，她即於twitter聲稱相片只有一個人擁有，矛頭似乎直指杜蒙特。有影迷更恐嚇杜蒙特，稱會到球場「打到佢嘔電」，但杜蒙特見字後迅速還擊：「嚟咪嚟，未驚過！」
不過，杜蒙特或者怕以上留言會引來聯盟及球隊的處分，最終刪除留言並澄清自己沒有發放床照：「我冇上載Jennette McCurdry嘅相，亦唔想再同佢有任何瓜葛，依家淨係想專心打波。」
另外，熱火昨日雖有韋迪（Dwyane Wade）休戰一仗後復出並攻入24分，但球隊作客仍以103比106不敵火箭，球隊八連勝同時終結，明日將要作客硬撼馬刺。
（now 635周五早上9時直播）