近年好興一句「贏在起跑線」，全香港差不多每個家長都望子成龍，希望自己嘅仔女成材。因為呢一句，令到香港進入咗搶學位、補習、學嘢、進修嘅時代，未夠兩歲學西班牙語，17個月大就踢波……總之就愈嚟愈早啦！
當好多機構都叫你嘅仔女贏在起跑線時，你又有冇諗過輸在終點時嘅失落會更大呢？其實香港一直都忽略長遠培訓，無論任何運動，到了20幾30歲，或者畢業後就叫做退休，要搵食。香港行小精英制度，即係話喺小一入學前就能出類拔萃，出水能讀，入水能游，飛天遁地，先會入到名校。小孩未完全發育下已經要晨操晚練，對身心成長有好大影響。唔難見到小學生已爆晒肌肉，六舊腹肌，成個機械人咁，睇到都慘，香港比世界好多地方嘅同齡小學生游得更快，跑得更快，喺不同地區或比賽贏得更多獎牌，不過，到咗公開或成年比賽往往比較少成績，因為運動員嘅「高峰」已過。
我唔係神童，但幸運地有好嘅教練慢慢畀我成長，父母嘅支持，將每日嘅訓練變成習慣，然後由習慣變成興趣，當你有成績嘅時候，自然你就會想爭取更好嘅成績，犧牲玩樂時間去訓練。呢個係點解我到咗依家，從游水到水球都抱住一個真誠嘅心態同明確嘅目標去繼續奮鬥嘅原因。
作為一個專業教練，我希望小朋友學游水嘅時候抱住愉快輕鬆嘅心情，再畀少少目標佢哋去追，當佢哋知道自己進步嘅時候，好自然咁就會想得到更多，有自己理想嘅運動員就係咁樣練成喇！小朋友可以輸喺起步線，但係唔好畀佢哋輸喺終點。
鍾國樑(Alex) 天生運動狂，前亞運游泳香港隊「水霸王」