公牛球迷呼喚甜瓜
「安東尼，加盟吧！」公牛昨日於主場鬥紐約人，憑中鋒諾亞（Joakim Noah）貢獻「三雙」，以109比90大炒對手，送給後者六連敗。公牛擁躉今仗可謂費盡心思，出盡法寶呼籲今季後成為自由身的紐約人王牌安東尼（Carmelo Anthony）轉投公牛。至於「甜瓜」輸波後則大吐苦水，更暗示有機會今夏投奔芝加哥。
公牛眾將今仗繼續將士用命打法，比賽初段已打出一段12比1攻勢，占美畢拿（Jimmy Butler）更於一次防守救波後，在觀眾席由後場走到前場，搵路出返球場，表現認真落力。公牛今戰有7人得分達雙位數，當中諾亞更造出13分、12個籃板球及14次助攻的「大三元」。而新加盟的射手費迪特（Jimmer Fredette）於賽事末段首次登場，上陣3分鐘貢獻2分及2個籃板球，公牛最終以19分之差大炒紐約人取得4連勝。
安東尼今夏勢逃亡
諾亞取得職業生涯第五次「三雙」，賽後謙稱刷新隊史中鋒單場助攻紀錄全靠一班隊友：「今場咁多助攻都係多得一班隊友落力幫手，我哋每場都有持續嘅進步。」大前鋒泰查吉遜（Taj Gibson）更將諾亞表現形容為MVP級數：「諾亞打到成個常規賽MVP咁，仲有咩可以挑剔？佢真係愈嚟愈全面。」
有公牛球迷今仗特登拉橫額呼籲安東尼季後投奔芝加哥，更有球迷穿上印有其名字的公牛球衣睇波。「甜瓜」賽後談及此事時亦感到很有趣：「我見到呀！呢個係一個唔錯嘅現象。」不過對於會否加盟公牛就不置可否：「我唔知你（記者）想我講咩，我連聽日會點都冇去諗，依家只係專注打好今季嘅比賽。」雖未知今夏去向，但安東尼對球隊表現明顯感到心灰意冷：「真係好難再有咩藉口解釋點解會輸。我真係好無奈，依家球隊好似無心戀戰，今場咁輸真係好肉酸，完全冇贏波決心。」