日本環姐速鎅南韓打星
終極格鬥冠軍賽（Ultimate Fighting Championship）「UFC澳門格鬥之夜」暨《終極鬥士》周六在澳門金光綜藝館舉行，除比賽夠晒刺激外，台上舉牌的Ring Girl亦甚具瞄頭，包括香港模特兒兼演員Jessica C，以及前日本環球小姐參選佳麗西垣梓（Azusa Nishigaki）。大會昨日安排西垣梓聯同其他選手與傳媒見面，會後她更大放生電，成功與南韓型男選手金東炫搭訕，果然夠進取！
西垣梓樣子甜美身材出眾仲要係單身，於活動中表示希望在香港結識男朋友，又向記者打聽香港男仔是否很好人！渴望戀愛的她，在活動結束後與今次賽事主角之一的南韓選手金東炫碰上。西垣梓立即與對方合照兼交換電話。
重頭大戰金東炫Vs海瑟威
金東炫對英國選手海瑟威一戰為周末的重點賽事，32歲的金東炫其實係半個娛樂圈人，曾演出南韓大熱節目Running Man Avengers特輯，又為K-pop組合MYNAME拍MV。不過佢同廣大韓劇迷一樣，會同教練一齊煲《來自星星的你》，仲話全智賢係佢理想對象。金東炫表示由於要練拳，所以只係「快睇」，但教練就煲到癲晒。講到今場賽事，金東炫話由於在亞洲地區舉行，適應上並無困難。
至於26歲的海瑟威，上周六已來港備戰兼適應時差。海瑟威冇煲韓劇，而且不是曼聯迷甚至足球迷，所以紅魔在歐聯淨吞雙蛋都無動於衷，佢話：「欖球先係我『飛佛』，我現時只會專心準備戰鬥。」
另外，31歲巴西選手阿爾伯特米納將代表香港上陣，他居港兩年已視香港為家，去年曾在張家輝電影《激戰》中客串演出。