打室內棒球挑戰極速
上周末又返去觀塘321PLAY，今次行上二樓，玩室內棒球！呢排工作壓力大，個人好躁，生咗幾粒豆豆，所以發洩吓，打吓棒球！
投球最高時速150公里
棒球在香港有一定數目捧場客，又有聯賽，不過由於場地的老問題，所以發展好緩慢。但要學根本難唔倒香港人，就好似呢度一萬呎地方，設有5條bay畀你打，由初級的慢速投球，到每小時達150公里投球畀你打，可以試吓同MLB球員對壘嘅感覺。假如你想學，呢度都有教練教你，可以學吓正確姿勢，位置等。不過我就鍾意自己嚟，一開始就揀個高速，喪打十幾球，成功率達七成，跟住再向難度挑戰，揀極速，成功擊球率達到六成！我諗我應該可以去香港隊度跟下，話唔定可以有第三春添？
除咗你心情真係好差，好需要發洩之外，我建議大家都係約埋幾個朋友一齊玩，唔使下下打波、打牌、打邊爐！
Tuesday with Alex
鍾國樑（Alex）
天生運動狂，前亞運游泳香港隊「水霸王」