超級碗貴為美國體壇年度盛事，NBA都知「唔夠撼」所以要讓路，故昨晨只安排塞爾特人對魔術獨腳戲。一眾NBA球星亦趁機感受超級碗狂熱，當大家以為柏臣斯（Chandler Parsons）入場坐包廂睇波夠豪，其實足不出戶嘅雷阿倫（Ray Allen）用巨型屏幕睇直播先係最豪享受！
據《休斯敦紀事報》透露，火箭「大鬍子」占士夏登（James Harden）負責機票費用，靚仔隊友柏臣斯就靠贊助商幫手拎到兩張超級碗包廂波飛，現場欣賞這場盛事。不過，熱火老將雷阿倫仲豪，特別喺家中泳池旁邊安裝35呎超巨型屏幕，仲請埋勒邦占士（LeBron James）齊齊「印印腳」睇直播。
傳加素做「太陽之子」
另據《ESPN》報道，明早將於主場硬撼公牛嘅太陽，計劃以奧卡科（Emeka Okafor）嘅到期合約加上首圈選秀權，交換湖人球星加素（Pau Gasol），為衝擊季後賽做好準備。（now 678周三早上10時直播）