恭喜發財！樑哥祝大家馬年行大運，一馬當先，馬上有錢！哈哈哈！大年三十我返咗屋企食飯，媽咪煮咗好多美食，食完初一就開工喇，因為我要評述係珀斯舉行嘅澳洲超級游泳挑戰賽。
雖然我退出泳壇多年，但係我冇同呢個世界脫節，多得電視台嘅賞識，我有幸為大眾評述各大游泳比賽，喺電視入面繼續同昔日戰友打氣。呢個邀請賽獎金豐厚，舊年先第一年搞有三支國家隊參加，今年已經邀請到五個國家出賽，包括有中國、日本、澳洲、巴西同南非。其實今年都有幾個大賽舉行，英聯邦運動會同亞運會都會喺今年展開，所以各國都派出以舊帶新嘅陣容出戰今次大賽，作為一項備戰。
澳洲經過倫敦奧運失敗後，致力培訓一班新泳手，希望同世界接軌，今年嘅英聯邦運動會應該會有不俗成績。日本自從倫奧後，人腳愈來愈齊，成績愈來愈好，入江陵介、萩野公介及瀨戶大也等都已經排名世界前十，所以亞運會佢哋都係大熱門。至於中國隊，全運會後一班泳手退休，吳鵬、周嘉威、趙菁等名將相繼退役，換來係由孫楊帶領嘅新國家隊，配合新秀毛飛廉、寧澤濤同埋葉詩文，應該可以同日本喺亞運會鬥餐飽。
長江後浪推前浪，世界正在進步，大家千祈咪停下來，繼續向前吧！一起萬馬奔騰吧！
鍾國樑（Alex）
天生運動狂，前亞運游泳香港隊「水霸王」