倫敦常規賽Encore
NBA倫敦海外常規賽變成籃球Crossover足球大Party！籃網與鷹隊昨晨在O2體育場進行海外常規賽，場上有籃網球星皮雅斯（Paul Pierce）、加納特（Kevin Garnett）及祖莊遜（Joe Johnson），場邊觀眾席亦都星光熠熠，曼聯、曼城、阿仙奴及車路士等英超星級fans喺唔同角落出現，一張飛剩係睇星都值回票價，NBA「準話事人」阿當施華（Adam Silver）梗係食住條水，計劃定期每年到倫敦開騷搵錢！
可容納兩萬名球迷的O2體育場昨晨座無虛席，當中一眾英超星級應援團更加搶盡風頭，車路士4子大衞雷斯、夏薩特、舒賀爾尼及雲堅基爾、維拉射手賓迪基、曼城前鋒迪斯高及曼聯翼鋒拿尼都有到場睇波。當中「爆炸頭」大衞雷斯更獲大批球迷要求簽名、合照，人氣最高。不過講到最畀面，肯定非阿仙奴莫屬！「兵工廠」乃今場海外常規賽「大戶」，除舊將皮利斯帶同老婆到場之外，計落就有普多斯基、梅迪薩卡、基拿比、基奧特、法比安斯基及韋舒亞等6位「廠仔」撐場，梅迪薩卡更披起同胞舒洛達（Dennis Schroder）的鷹隊戰衣添！
祖莊遜撒網獵鷹
兩支ＮＢＡ隊伍亦未有令捧場客失望，合演一場大手交易，總共有5位球員得分達雙位數的籃網，憑祖莊遜攻入全場最高的29分，以127比110勇挫鷹隊。睇見現場球迷反應熱烈，下月即將接任聯盟總裁一職的阿當施華都食過翻尋味：「O2體育場設備完善，球迷亦都對ＮＢＡ好支持，我決定每年都會定期喺倫敦舉行海外常規賽。」
