【本報綜合報道】牙買加飛人保特最近拍咗一個新廣告，佢又扮師奶又扮ＢＢ，呢位100米、200米跑世界紀錄保持者拍廣告之餘，亦好努力訓練，日前仲公開練習刻苦到嘔嘅片段。
保特嘅新廣告早排喺英國播出，仲出動咗「全家人」亮相！不過，其實所謂「全家人」都係保特自己扮，由阿爺到ＢＢ都係保特個樣，仲有英國長跑好手法拉「客串」添。不過，唔好以為佢家下喺田徑場上冇咩對手，就剩係識得去拍廣告掘金，其實呢位27歲飛人仲好畀心機練習，仲練到嘔埋出嚟！
「閃電俠」日前喺Instagram上載影片，仲留言話：「想做世界第1就係咁辛苦！」只見到佢喺條片入面彎晒腰好似好攰，然後扣一扣喉就係咁嘔，然後就搖一搖頭，似係示意自己都頂唔順。