折翼高比永不服輸

錯過聖誕大戰熱火

NBA悲情球季延續，繼戴歷羅斯（Derrick Rose）又再收咧之後，高比拜仁（Kobe Bryant）亦告中招。湖人本周三作客以96比92擊敗灰熊，高比於第3節背籃進攻時被東尼阿倫（Tony Allen）撞傷左膝，雖然「小飛俠」經治理後照樣完成賽事並攻入21分，但昨日接受磁力共振檢查後證實左膝外側脛骨骨折，至少要休戰6個星期，意味高比肯定無緣聖誕大戰對熱火之戰，起碼要到明年1月底才有望復出，2013提早收咧。

球迷固然擔心高比的生涯會否「玩完」，而不少球評家都睇這位「傷完又傷」的老將無得翻身。面對大眾質疑，高比昨日透過twitter發表不服輸宣言，留言稱「#BrokenNotBeaten」，並死撐說：「好慶幸半月板冇傷，抖6星期好過抖6個月，我會重返戰場，質疑我嘅人都係白癡！」

湖人急簽馬素爾頂檔

NBA昨晨公布2013年第4季（10至12月）球衣銷量榜，力壓高比成為「全球賣衫王」（見表）的勒邦占士（LeBron James），亦有有透過twitter留言希望「小飛俠」早日康復。隨着高比打柴，湖人的傷兵名單「水蛇春咁長」，會方昨日急簽前太陽控衞馬素爾（Kendall Marshall）解困，預計明日造訪勇士之戰，將會處子登場。

（now678周日早上11時30分直播）