黃佩霞望子瑜願
曾經係唔少男士眼中性感女神嘅黃佩霞Almen，離開娛樂圈開瑜伽班10年有多，時光飛逝，佢個大囝Zanskar Blair（阿Z）已經17歲，熱愛足球嘅阿Z身兼西島學校翼鋒及傑志青年軍。仔大仔世界，最近阿Z決定外闖，隻身去下屆升上甲組嘅巴西球會費古倫斯學法，媽咪Almen送份禮物畀囝囝傍身，呢分大禮就係「瑜伽四式」，希望囝囝隨時都用得着！
阿Z喺香港成長，就讀西島學校，並加入傑志青年軍，立志成為一名職業足球員。但礙於其佢美國國籍嘅身份，如果要係港甲落班就佔用外援名額，所以阿Z決定向更遠大目標進發，今年十月遠赴巴西磨練球技，希望留喺「足球王國」發展，或者到北美尋覓足球夢。
能夠到巴西球會跟操，全賴阿Z嘅爸爸出力，佢Daddy係一名耐力賽運動員，一次到巴西參賽時結交咗位足球教練，於是為阿Z搭路促成今次巴西之旅。不過對方亦要睇過阿Z比賽影帶，認為夠料先得，結果阿Z順利加入費古倫斯受訓。
慶幸非低頭族 踢波助成長
黃佩霞有一子一女，看見囝囝為自己理想奮鬥大感安慰，佢話：「依家好多年輕人都係『低頭族』，好難得佢唔係，足球呢項運動強調團體合作，對阿Z成長好有幫助。」對於囝囝將來出路問題，Almen坦言唔太擔心：「我哋為人父母，只須幫仔女製造機會，等佢哋自己發揮潛能就夠，阿Z唔識葡語，但我相信他應該搞得掂。」
