騎士呼喚占士回家

勒邦占士

「大帝」占士三年前離棄騎士成為叛徒，轉投熱火後連奪兩屆NBA總冠軍圓夢。適逢「大帝」明夏將回復自由身，一直有傳這位兩屆MVP想回歸騎士終老作補償，不少對「大帝」恨之入骨的「反占躉」近年亦開始軟化，只係盼望占士早日回歸克利夫蘭。

據《俄亥俄州網》報道，一位叫拉治（Josh Raggi）的24歲球迷最近發起「勒邦回家」行動，呼籲克利夫蘭球迷用行動打動占士回歸。拉治受訪時表示：「騎士球迷貝亞（James Blair）去年衝落球場求占士回巢，我喺屋企見到呢一幕好感動，開始諗我係咪應該做啲嘢呢？」

呼籲大帝回家的設計標誌。

大量宣傳Tee恤已印好備用。

周四鬥熱火勢起哄

現時任職地產經紀的拉治，除了以「勒邦回家」作主題開勻instagram、twitter及社交網站帳號做宣傳外，今日開始更會在占士母校、聖文森高中附近登足八個星期大廣告造勢，並已印製2,000件「勒邦回家」Tee，準備於周四派發給球迷。拉治表示：「當日我同貝亞會喺騎士主場門口派Tee，只要球迷着起佢影張相，然後掟上網標誌番「@ComeHomeLebron」口號，就有機會贏到騎士來季季票。」

拉治話今次「勒邦回家」行動已豪使5萬美元（約38.7萬港元），未來日子更會找贊助商合作，於年尾進行第二炮游說占士的攻勢：「我哋（騎士球迷）唔係求占士回巢，只係想畀佢知道克利夫蘭人民已經原諒佢，同埋騎士唔再係魚腩，佢返嚟會有幫手，一樣可以繼續衝擊總冠軍。」騎士周四主場恭候熱火，消息指有球迷計劃衝落球場勸占士「回家」，屆時場面肯定非常哄動。