NBA常規賽正式開打，筆者昨晨一早觀賞直播，兩場賽事熱火對公牛同湖人對快艇都非常精彩，筆者同時睇好熱火好大機會造出三連冠。熱火今夏只簽入比士利及前狀元奧登，不過從昨仗對公牛所見，一眾舊將經過兩年磨合已非常合拍，產生極大嘅化學作用。筆者認為熱火今季要追平上季66勝嘅成績並不困難，更睇好球隊可以取得70場勝仗；而熱火球員嘅目標當然係追平甚至超越公牛90年代造出嘅72勝NBA史上最好常規賽成績。
筆者同時預測今季東岸四強，除熱火外仲有公牛、籃網及溜馬。公牛自戴歷羅斯復出後整體實力有所提升，相信會係另一前四分子。至於今季豪擲過億美元打造富豪兵團嘅籃網，雖然未必可以即時攞到總冠軍，但以球隊實力要打入前四實在唔成問題；最後一隊自然係筆者上季已品題嘅溜馬，今季喺一眾球員大熟大勇下，有力取得更好成績。
至於西岸四強則較睇好雷霆、馬刺、快艇和火箭。筆者較早前曾去台灣觀賞火箭對溜馬嘅季前賽，火箭今夏得到杜域侯活加盟後，實力明顯有所提升，「超人」與占士夏登一裏一外嘅配合，加上筆者睇好柏臣斯今季會大爆發，這個火箭「鐵三角」絕對係球隊得分重點。林書豪雖喺火箭台灣季前賽正選上陣，但筆者認為J.Lin今季會被防守性較強嘅貝弗利取代，不過這對林書豪而言未必係壞事，因為火箭嘅陣容將會變得更靈活，既可打雙塔戰術，又可藉杜域侯活出任中鋒配合四名較矮球員打「小球陣容」，而J.Lin嘅得分能力唔算差，出任後備將令球隊板櫈實力有所提高，對球隊長遠嚟講係好事。火箭上季取得45勝37負僅僅趕上季後賽尾班車，筆者睇好佢哋今季會攞到50場或以上嘅勝仗打入西岸四強。