占士未開波已熱爆
NBA常規賽下周三開打，聯盟按慣例向各支球隊的總經理進行問卷調查，結果「大帝」勒邦占士（LeBron James）獲大圍睇好冧莊最有價值球員兼帶領熱火「3連霸」。占士一直想追趕米高佐敦（Michael Jordan）的籃壇成就，新季就決定復刻經典，預告開鑼戰或以「80年代短褲仔Look」亮相，贏波仲要贏Look！
聯盟向30位球會總經理進行了問卷調查，總經理們不能選擇旗下球隊及球員為準則，共回答了56條問題，最終占士一如所料獲睇好繼續統治NBA，足足有69%選票認為「大帝」會第5度奪得MVP，並有75.9%選票Tip占士可率領熱火勇奪NBA總冠軍。
除此之外，這位熱火Icon更被選為「迫使對方教練作出最多調整的球員」、「最佳小前鋒」、「最有威脅球員」及「經理人最渴望擁有的球星」，氣勢迫人。
開鑼戰或以80年代裝上陣
「大帝」初出道時被譽為艾榮（Julius Erving）接班人，早前他更以一身懷舊Look向「J博士」致敬，並向球迷大賣關子，預言新季會以復刻Look亮相：「80年代嘅短褲仔造型係經典，我考慮喺開鑼戰或者其中一場常規賽復古，着條短褲落場。」另外，獲4成選票睇好殺入NBA總決賽的馬刺，昨日以123比101大炒到訪的魔術，明早繼續於季前賽主場出擊，硬撼另一支西岸勁旅火箭。
（now678台周五早上8時直播）