大戰好氣氛孖妹都讚Good
直播今屆學界D1泳賽的now Sports派出雙妹嘜記者陳楚淇Yuki及張嘉殷Yan在池邊四圍走，搵得獎選手做即場訪問，報道現場情況，兩人都係第一次做學界泳賽，感覺好新奇，現場氣氛仲估唔到咁熱鬧。
泳手數百 場刊索料
呢對孖妹昨日齊齊梳一頭長髮，離遠望仲以為係孖生姊妹，兩人在now Sports其實各有專長，Yuki主要負責外國波報道，主力做英超賽事，至於Yan就較多外勤工作，主力係做本地足球賽事。
Yuki同Yan今次獲派到九龍公園採訪學界泳賽，由於之前從未做過類似比賽，對住幾百個泳手、過千師生打氣場面，感覺好新奇，Yan話：「估唔到學界泳賽氣氛咁熱鬧，除咗訪問得獎泳手，都要採訪各間學校打氣團。」
至於Yuki就比較緊張賽事資料，揸住本賽事場刊猛咁刨，佢話：「最緊要留意有機會破紀錄泳手，佢哋隨時係泳壇明日之星。」佢仲話有個電視台同事係聖若瑟校友，尋日專登告假為母校打氣，所以呢位同事亦會做「內應」，幫手安排做訪問添！