姜華珺世界盃闖4強！呢位香港女乒名將雖然因好姊妹帖雅娜待產，要「單拖」出戰日本嘅世界盃乒乓球賽，但佢愈戰愈勇，小組出線後闖入8強，尋日更加以4比1掃走西班牙沈燕飛攞到4強席位，今日會同中國劉詩雯爭奪決賽資格。
港女一直喺世界盃有唔錯成績，姜華珺喺2010年馬來西亞嗰屆就闖入決賽，可惜最後輸畀郭躍只得面銀牌，佢希望聽日可以再有突破，甚至衝擊冠軍。不過，主場嘅日本孖寶「瓷娃娃」福原愛同石川佳純，雖然全場球迷為佢哋「奸爸爹」，但都要雙雙出局，分別輸畀中國武揚及新加坡嘅馮天薇，8強止步，搞到「瓷娃娃」皺哂眉。
講起「瓷娃娃」同石川，佢哋會連同平野早天香等組成「最強組合」出戰10月嘅天津「末代」東亞運動會，試圖「偷雞」衝擊金牌，留下美好回憶。