強颱風「天兔」襲港，尋日三場甲組波當然要改期，作客約旦踢亞協盃嘅傑志上周六晚已經出發，廣州恒大亦急急腳提早飛去日本備戰亞冠盃，個個都安排妥當，點知「賴低」中國女排！中國女排剛喺泰國打完亞洲賽，尋日飛嚟香港轉機返北京時遇上打風，全隊唔走得被迫滯留，嗌晒救命。
本報體育組同事尋日突然收到中國女排副攻手楊珺菁嘅求救微信，佢話中國女排喺香港機場滯留，冇飛機、冇酒店、冇巴士，希望有人幫到佢。原來中國女排喺泰國打完亞洲賽，周日凌晨5點喺曼谷上飛機，中午到港，準備轉機返內地先發覺航班取消，但又攞唔到行李，想喺香港住酒店又冇房，連返大陸嘅大巴同直通車都冇晒，狼狽到極。
「小菁」話，佢哋成班球員凌晨出發，嚟到香港折騰咗大半日都未休息。直至黃昏，佢哋終於搵到地方落腳，入住喺紅磡區嘅酒店，總算有覺好瞓啦。
尋日掛三號波嗰陣，足總約喺早上11時已宣布甲組賽事屯門對天行元朗、東方沙龍對愉園改期，仲有前晚已經話改期嘅橫濱FC（香港）對太陽飛馬，至於傑志就最醒目，颱風襲港前，佢哋喺前晚漏夜出發，先飛卡塔爾多哈，再轉機約旦。
剛殺入亞冠盃四強嘅廣州恒大，周三先喺首回合作客日職勁旅柏雷素爾，為怕颱風影響埋廣州航班，佢哋尋日已經坐包機到咗日本，提早備戰。