勒邦占士（LeBron James）新季「屈晒機」！電子遊戲勁Game《NBA 2K14》下個月上架，製造商2K sports連日來不斷發布遊戲片段，昨日更透過twitter公布「機迷」最關心的球員能力值，上季彈起的溜馬新星保羅佐治（Paul George）的數值會「升呢」至88，不過封面人物「大帝」就最「屈機」，能力值竟高達爆燈的99，外投、剷籃、入樽瓣瓣掂，總之就Game內Game外都隻手遮天！
講番現實世界，占士効力的熱火昨晨宣布，以1年價值100萬美元（約775萬港元）的非保障合約簽入比士利（Michael Beasley），該位24歲小前鋒早前因服食大麻被太陽「炒魷魚」，如今有幸回巢加盟衞冕冠軍熱火，比士利即刻向陣中「大佬」韋迪（Dwyane Wade）刷鞋：「我決心改過，唔會再令韋迪失望！」