漫長嘅NBA休賽期接近尾聲，球員喺準備回歸球場時，盡量爭取時間玩多陣。快艇中鋒迪安迪佐敦（Deandre Jordan）近日搞咗個Cosplay派對，內容係以「超級英雄」做主題，快艇隊友格芬（Blake Griffin）同班尼斯（Matt Barnes）亦有份參加，三人的扮相都非常出人意表，唔講真係認唔到係佢哋。
喺呢個扮嘢派對中，格芬及班尼斯都顯得非常另類，格芬喺人人都扮「超級英雄」情況下，將自己扮成《蝙蝠俠》入面的大反派班恩（Bane），而佢嘅隊友班尼斯則扮演英雄失神俠（Blankman），一身紅衫帶住眼罩同黃手套，比原著顯得更魁梧，佢太太亦以「蜘蛛女俠」造型參加派對，非常性感誘人。
同班尼斯相比，迪安迪佐敦嘅打扮就絕對係「嚇死人」，只見其一頭綠髮及一套緊身衣，就算冇看過地球超人（Captain Planet and the Planeteers）嘅朋友都一定笑爆嘴。迪安迪佐敦仲係自己Instagram公開整個化妝過程，幫佢化妝嘅朋友都可謂落足心機，等他睇嚟同原著人物冇太大分別。
除格芬、班尼斯和迪安迪佐敦外，轉投雷霆嘅前快艇球員高美斯（Ryan Gomes）亦有於派對出現，他扮演的角色係美國隊長（Captain America）。派對上仲有超人、鋼鐵俠及雷神等「超級英雄」，真係「星光熠熠」。
本報綜合報道