李宗偉新手老竇湊唔掂B
「升呢」做咗老竇嘅世界羽毛球「一哥」、拿督李宗偉，跟馬來西亞國家隊嚟香港集訓，「磨利把刀」希望喺8月5日廣州舉行嘅世界賽爭番個金牌，尋日佢見到港女隊教練王晨個仔咁得意，忍唔住抱嚟玩吓，但就有啲「雞手鴨腳」喎！
前排孫楊嚟過體院秘練，喺巴塞隆拿世界泳賽就做咗「雙金王」，今次「李拿督」來港適應天氣兼谷體能，仲同港將黃永祺對練，李宗偉話好恨第一次喺世界賽摘金。4月初同妻子黃妙珠「一索得男」嘅佢，要暫別兒子，難免牽腸掛肚：「今次要同囝囝分開半個月，真係好掛住佢，每日都會打電話返屋企，加埋視像，見佢幾面！」李宗偉仲話以前練完波多數喺外面食飯，但依家會趕番屋企，盡量陪老婆同個仔。
