高比拜仁今日嚟喇
繼「佐敦牌」三子格芬（Blake Griffin）、基斯保羅（Chris Paul）及安東尼（Carmelo Anthony）上月底襲港後，今日就輪到湖人球星高比拜仁（Kobe Bryant）「接力」，連踩旺角及灣仔與fans作近距離接觸，各位球迷準備追星啦！
今午由波鞋街殺落修頓
去季因跟腱撕裂提早收咧的「小飛俠」，日前乘搭私人直昇機飛抵球場觀看洛杉磯道奇隊硬撼紐約洋基的職棒大戰。據《Rotoworld》報道，高比行路並冇一拐一拐，腳傷明顯已好得七七八八，故有消息指這位湖人球星不但可於10月底展開的新季NBA常規賽復出，更有望提早於季前賽上陣。
三年來再度訪港的高比，今日正式展開「2013 NIKE Basketball」訪華之旅的首站，他先會於今午1時30分於旺角波鞋街現身出席宣傳活動，之後5時就會殺落灣仔修頓室內運動場，為本年度NIKE League主持頒獎儀式。