呢位F1車手上星期透過twitter寄意要珍惜眼前人，前日幫新効力嘅平治車隊贏得首個分站冠軍之後，仲即刻話要將冠軍獻畀「Special One」，大家咪以為係莫連奴，英國《每日郵報》追問呢個「Special One」係咪Nicole，咸美頓點頭承認。
豪使430萬氹女友
咸美頓已經Plan咗個價值9萬鎊嘅私人飛機旅程同愛人去玩，又豪使15萬鎊裝修到屋企個更衣室靚一靚氹Nicole回歸，加上早前送畀伊人價值12萬鎊嘅鑽石手鏈，「黑帝」起碼使咗36萬鎊（約港幣430萬）箍煲，落咁重本，照計Nicole應該會回心轉意啩！