雲集全球至Top飛魚、包括18位世界冠軍級猛將的世界游泳錦標賽，將於周五假西班牙巴塞隆拿揭幕，今年賽事設立破紀錄的310萬美元獎金，利誘各路飛魚締造世績，睇頭十足！本報請來擔任賽事專業評述的「水霸王」鍾國樑，點評5大必睇美女飛魚，當中「匈牙利泳模」積嘉寶絲一對藍眼睛最吸引，而「美國甜心」富蘭克琳笑容亦甜到殺死人。前香港泳隊及水球隊的「樑哥」，話好Enjoy為有線體育做旁述：「自己性格鍾意講嘢，自從倫奧開始，漸漸累積了『開咪』經驗，建立自己一套旁述風格。」19日開幕式後，翌日展開跳水、韻律泳及公開水域賽事，而游泳則於28日開鑼。
年齡：24歲
奪牌指數：☆☆☆
曾3次參加奧運（04、08、12年），兼且贏得歐洲游泳短池賽2金、5銀、5銅的積嘉寶絲，是令人一見傾心的女孩，身兼泳手及Model兩職，鍾國樑形容她是「男人都會喜歡的中歐女孩」：「佢最吸引人之處係一雙藍眼睛，而且佢做Model影好多靚相，擺甫士都好專業。」憑着頻頻出戰獎金豐厚的世界盃分站賽搶分，積嘉寶絲已被視為泳壇「小富婆」。除了外表，積嘉寶絲當然亦有實力爭獎牌：「我諗佢喺混合泳同蝶泳都有發圍機會，其中400IM（混合泳）有機會遇上中國嘅葉詩文，到時睇吓佢狀態夠唔夠弗嘞！」
年齡：18歲
奪牌指數：☆☆☆☆☆
「後菲比斯年代」人人爭上位，鍾國樑認為富蘭克琳無疑是女子賽事中的奇葩：「佢喺倫奧已經攞咗4金，今次世界賽亦已入圍100及200米背泳及自由式，以及50背，連同接力，她分分鐘可擸走7至8面獎牌、甚至金牌，我好期待睇佢做唔做到『女版菲比斯』。」外形方面，富蘭克琳勝在Sweet，經常笑容滿臉，露出整齊的牙齒，「佢都好貪靚，成日擦唔同顏色嘅指甲油。」
年齡：24歲
奪牌指數：☆☆☆☆
游水游到攞澳洲勳章的奧運金牌飛魚芭妮特，一直是澳洲美女團中的代表人物之一，她與「老死」萊絲經常以孖妹形象出現，而芭妮特的樂天性格更加吸引泳迷注意。出征巴塞前小妮子與泳隊到了泰國集訓，她最鍾意曬太陽，不過就曬極唔黑。今次世界賽她也集中火力爭取200及400米自由泳的獎牌，而4x200自接力更是她們搶金的重點項目。
年齡：24歲
奪牌指數：☆☆☆☆
情史及賽績同樣引人入勝的佩歷珍妮，貴為意大利史上首位奧運金牌女飛魚，以及兩項世界紀錄保持者（200及400自長池），她宣告領軍意國出征巴塞，已成為國際泳聯賽事官網的頭條新聞，而令人更期待的，是她放棄強項中距離項目，轉為專攻背泳，且看這位連高比拜仁都讚靚的美人魚，能否走出倫奧失利的陰影，重新出發。
陸瀅
年齡：24歲
奪牌指數：☆☆
「好多人嘅『贏樣』都好兇狠，不過來自上海嘅陸瀅就比較優雅啲，而且佢游開蝶式，所以骨架較橫，係中國隊中高頭大馬一族，身材突出，我記得佢喺伊斯坦布爾嘅世界短池賽都游得唔錯，攞到50蝶金牌，希望佢今次能在長池突破啦！」陸瀅曾與劉翔一張合照中，顯露了導彈身材，這一點亦成為傳媒經常談論的對象，不過她表示已經習慣了。