憑「海盜拳」成名嘅鄒市明尋日嚟咗香港，準備下周六於澳門威尼斯人舉行嘅《皇金拳賽II》，呢位中國拳王鬥心爆棚，除咗搵教過「拳王」泰臣、「菲律賓拳霸」帕克奧嘅Freddie Roach拜師學藝之外，亦用「3kg」重繩鍛練，實行以弗爆狀態應戰。
早前有報導指佢喺體能訓練跳重繩「跳到嘔」，呢位兩屆奧運冠軍尋日即場跳到斷繩（另一條繩），證明自己無懼呢項訓練，連星級體能教練Gavin MacMillan都話佢弗。鄒市明話：「之前復操未適應，加上跑步吹咗風先至嘔，不過第一次見到咁粗嘅繩，跳到第10下就冇晒力，咬牙硬撐先至頂到60下，結果手都被磨破！」
對於27日同墨西哥拳手赫蘇斯奧爾特加進行6個回合比併，鄒市明話K.O.與否次要，只着眼於做好自己！
