想轉事業運嘅俄羅斯天后舒拉寶娃宣布，聘請前世界第一名將干納斯「出山」擔任其教練。話說英國梅萊請咗前「一哥」冷面殺手蘭度執教後，成績突飛猛進，舒拉寶娃梗係想有樣學樣喇，於是搵番個前「冧巴溫」做教練，一於複製「梅萊方程式」！
喺溫布頓次圈出局嘅寶娃，日前同合作咗約3年嘅教練湯瑪士中止合作關係，原來她一早有後着，火速搵嚟8項大滿貫得主、60歲嘅美國名宿干納斯幫手。寶娃話：「我與Jimmy（干納斯）認識多年，並且曾經喺2008年嘅澳網前合作過一陣，以後有他做我嘅合作夥伴，實在令我期待，希望成績有所突破。」
另外，有傳新科溫網盟主梅萊有機會封爵，但英國一個民調顯示，有55％受訪者認為佢唔配爵士銜頭，只有26％嘅人支持他做「阿Sir」。