「水霸王」鍾國樑瞓身推廣
講起水球，又點少得「水霸王」鍾國樑呢？本身係香港長途泳代表嘅佢，近年轉打水球且有出色表現，而為將水球運動普及化，「肥樑」將佢喺04年創立嘅皇瑟游泳會轉型，與Adventure Sports Academy合作開辦正規水球會，仲請咗前國家代表梁文超做教練，希望培訓更多年輕新血加入。
普及先由龍門框做起
「肥樑」就話要將水球普及，就要由輕便嘅龍門框開始：「政府興建咗好多足球同籃球場，提供埋龍門框同籃球架畀市民，但玩水球用嘅龍門框當然就唔會度度有！為咗可以普及水球，我由外國引入一啲好似龍門架、羽毛球網架等大型運動器材，可以利用充氣形式，變成堅硬塑膠質地，安全又易攜帶。球隊可以自備龍門框去打波，解決一般場地無設施嘅問題。」