沈雅欣：水球Happy收身

前香港游泳隊「蛙后」沈雅欣（Irene），兩年前接觸過水球後就不能自拔咁愛上，仲「過檔」成為水球港隊代表添！Irene話水球好玩之處在於成Team人玩好Happy，而佢亦推薦呢項運動畀一心想減肥收身又怕熱嘅人士：「打水球要爭波、射球……無波在手又要不斷『踩水』，但浸喺水一啲都唔覺熱，想減肥好見效o架！」

睇吓Irene呢副健美身材，就知道水球可減肥絕對冇點你。

雖然因工作繁重，Irene喺今年4月已退出水球港隊，但依家都有Keep住打，仲做埋教練培育下一代。

問到點解當年由游水「過檔」到水球，Irene就解釋話：「以前喺線道游水比賽只得一個人戰鬥，贏輸壓力只得一人承受，真係好孤獨！相反，打水球13個人一隊波，如果我犯錯都有隊友一齊去補救；而從中與戰友經過訓練、勝利、失敗……呢份友誼好難喺游水得到。」

學齊必殺技，打波更犀利。

射波

Irene又話打水球競爭性強，過程千變萬化，就好似喺水入面踢足球咁。佢強烈推薦畀所有想減肥嘅男女都啱玩：「打水球嘅體力消耗好勁，因為比賽期間唔可以觸碰池邊同池底，即係球員要喺打波嘅同時，無論有無波喺手，都要無間斷咁『踩水』浮面，運動量一啲都唔嘢小，但喺水度又唔會畀啲汗搞到『黐立立』，絕對係減肥良方！」