女版李小龍水療拉筋爽晒
玩水能醫百病！即將代表香港遠赴保加利亞，出戰ITF跆拳道世錦賽嘅「女版李小龍」陳鈺芸（JuJu），早前因訓練整傷背脊，大大影響備戰！不過，JuJu喺隊友推薦下試玩水療拉筋醫背傷，效果唔錯之餘，仲可以紓緩平日種種積勞成疾嘅都市病。唔信？即刻落水試畀你睇！
身為武打影星嘅JuJu，除咗有歌手身份之外，仲係跆拳道嘅香港代表，並將聯同陳如茵及李康進出戰世錦賽，當然忙到甩轆。就係因為壓力大同休息時間唔夠，搞到兩周前拉傷背脊，影響備戰同發揮。為咗紓緩背痛，JuJu就喺隊友介紹下試用水療拉筋，結果成個人即刻爽晒。
水力承托陸上做唔到
教練YY解釋點解喺水入面做拉筋咁有效：「水療嘅好處係當人體入咗水中，水嘅壓力就好似從四方八面，不停咁按摩你嘅肌肉同關節，針對性紓緩肌肉痛，以及有效醫治關節病痛。另外，最重要有啲拉筋動作喺陸上係做唔到，但有咗水嘅承托力之後，減去身體一半重量，就可以做到練到三頭肌及膊頭肌肉嘅『臂撐』等動作……而JuJu嘅背傷，我建議佢先用浮條墊起身體，再不停用雙腳左右搖動，咁樣就可以紓緩、甚至復原腰椎移位或坐骨神經痛等症狀。」
紓筋活絡醫埋都市病
除咗醫背痛之外，YY仲醒多幾招畀JuJu嚟醫佢啲都市病：「好多都市人都因為成日四圍走而令到腳痛，尤其係上落樓梯時對膝蓋對上嘅四頭肌負擔最大，若然能夠加強呢部分肌肉，就唔會因為行得多而腳痛。要鍛煉呢組肌肉好簡單，喺水入面用浮條墊起隻腳，然後利用水阻同承托力，不停上下、前後擺動，多練就OK嘞！」
試過水療拉筋嘅JuJu都讚話整個人都放鬆晒，啲筋骨都冇咁緊，但YY提醒佢其實水療運動唔係一次半次可收效，最好一星期做3次，每次30至45分鐘，咁樣效果就會最好。
圖／文：司徒子文
鳴謝：德藝會（2993 6688）
泳衣提供：Maxxii Mode Designer Swimwear