F1平治德國靚仔車手洛辛保前日放低軚盤，轉做乘客，皆因得到効力阿仙奴的老友球星普多斯基邀請，出席F1德國站宣傳活動，仲坐在「科隆王子」駕駛的德國DTM房車，於紐伯靈賽道以時速高達170英里遊車河。
雖然話普多斯基手車唔曳，以前仲玩過拉力賽，但如果「有乜冬瓜豆腐」，洛辛保又點同車隊解釋呢？可能被普多斯基兜到他頭暈暈，近3站贏了2冠的他，昨日在排位賽竟然在Q2就被淘汰出局，最後只能以第11位出戰今日正賽，反觀他的隊友「黑帝」咸美頓就表現Sharp醒，力壓「紅牛」孖寶維度爾及韋伯，今季第3次贏到排頭位資格。
（now 670今晚7時45分直播）