不少球迷相信已看過很多杜域侯活（Dwight Howard）被合成的圖片，但今次係千真萬確。不少媒體昨晨爆出「超人」決定加盟火箭後，杜域侯活已將twitter頭像換成身穿火箭12號球衣的自己，下面地區一欄更寫上休斯敦，隨後更正式宣布加盟火箭。
「超人」於twitter說：「我已經正式成為火箭一員，我認為呢度係對我未來最好嘅地方，非常興奮成為呢隊波嘅一員，同時期待一個偉大嘅球季。多謝洛杉磯嘅球迷，祝佢哋一切都好。」侯活其後接受訪問時坦言：「喺我眼中，火箭擁有好多年輕球員，同時有一位好教練麥希爾（Kevin Mchale），我覺得可以喺佢身上學到低位技術，幫我提升到想要嘅層次。」
這一幕令很多球迷都想起三年前的勒邦占士（LeBron James），當時「大帝」突然宣布加盟熱火，和保殊（Chris Bosh）、韋迪（Dwyane Wade）組成「三巨頭」，結果過去三季兩奪總冠軍。杜域侯活能否做到這一點可能言之尚早，但兩人的決定倒有很多相似之處。
杜域侯活和當年的占士同樣對總冠軍充滿渴望，而「超人」今日這個決定亦可能徹底改變聯盟整個格局。火箭得到杜域侯活後已有組建「三巨頭」的打算，下一目標相信係「鷹王」祖斯史密夫（Josh Smith），一旦成功組成占士夏登（James Harden）、祖斯史密夫和杜域侯活「三巨頭」，儼然係2010年熱火的翻版。驟眼看來球員實力上可能略遜一籌，但他們卻更年輕，具備發展空間，有力於西岸崛起，挑戰列強。
只要火箭能於未來數季贏得至少一個NBA總冠軍，有長約在身的杜域侯活和占士夏登極有可能創造新一個火箭王朝，重現20年前奧拉祖雲（Hakeem Olajuwon）和德斯拿（Clyde Drexler）的壯舉。