英國《鏡報》大爆曼城成為黑客攻擊對象，消息指會方機密球探系統曾被入侵，管理層立即聘請電腦專家徹查，希望可以堵塞漏洞，同時決心揪出發動今次網絡諜戰嘅幕後黑手。
《鏡報》指曼城係採用網上Scout7系統進行球探工作，記錄低晒全球收購目標嘅分析同評價，會方發現呢個超級數據庫有被黑客入侵過嘅迹象，由於系統內嘅資料屬高度機密，所以管理層大為緊張。佢哋搵咗班電腦間諜專家幫手調查，若然真係出咗事，就諗計解決問題。今次英超爆發網絡諜戰，曼城消息人士認為係其他英超球會，包括死對頭曼聯、車路士及阿仙奴所為。曼城早前急急簽入費蘭甸奴同捷西斯拿華斯，唔排除係因為今次洩密事件而提前出手。