相信球迷一定認為NBA球員就球技出眾，咁又未必！兩大湖人球星杜域侯活（Dwight Howard）及慈世平（Metta World Peace）日前分途出擊，各自單挑師奶同小朋友鬥射罰球，結果就齊齊出洋相。
侯活職業生涯罰球命中率不足58%，《洛杉磯時報》特別安排一場罰球大賽落佢面，找來一位育有3名小孩的家庭主婦Kelly做對手。Kelly甫落場就以「唔知你係乜水」作挑釁，侯活亦不甘示弱，表明用左手讓賽兼打賭5,000美元（約3.8萬港元），奈何「超人」講就天下無敵，最後以3比5中不敵師奶Kelly。
侯活賽後面燶燶自爆患「恐罰症」：「我個腦有問題，成日因為擔心射失罰球諗得太多，最近開始搵球會精神科醫生傾偈。」「超人」仲透露今夏會拜訪勇士名將穆連（Chris Mullin）惡補罰球，計劃每日射夠1,000球提升命中率。查實侯活仲諗緊下季去邊度打波。據《ESPN》記者報道，「超人」近期與基斯保羅（Chris Paul）經常通過短訊交流，商討下季聯手的可能性，更指兩人傾向於快艇合作。兩人曾於2011年停擺期間已討論去小牛的可能性，可惜最終告吹，今次未知又會否成事呢？
而「超人」隊友慈世平則挑戰最近賽和高比拜仁（Kobe Bryant）及射贏奧尼爾（Shaquille O'Neal）的兩歲「罰球神童」泰特斯（Titus）。慈世平最終以6比11落敗，泰特斯亦延續與NBA球星鬥射罰球不敗神話。