湯卡華利開心自由行
湯卡華利「自由行」勁食反轉油尖旺！嚟到香港，曼聯中場球星「聰明仔」湯卡華利除咗勁影維港美景外，當然要吔餐飽，尋日朝早擦完地道粉麵後，仲試埋咖喱魚蛋同雞蛋仔。除為食外，「聰明仔」仲好貪靚，上晝短短兩粒鐘就換咗3套衫。不過佢一啲架子都冇，就算勁攰，仍為食店老闆喺恤衫上簽名，認真抵錫！
湯卡華利昨晨約11點離開下榻嘅半島酒店，開始上晝「自由行」。經由贊助商帶路，佢先到海防道街市入面嘅熟食中心醫肚，嚟到香港當然要食地道嘢，揸晒筷子勁擦粉麵，手勢仲非常熟練。食完嘢佢到咗尖東海旁為贊助商影相，當佢擺完「型甫」完成拍攝工作後，就攞自己部Smartphone出嚟，勁影維港景色。
兩粒鐘換3件衫勁貪靚
隨後「聰明仔」同工作人員去到九龍公園小型足球場，同兩名傑志青年軍會面，進行足球交流，然後到訪彌敦道一間小食店，品嘗雞蛋仔同咖喱魚蛋兩款港產小食。值得一提，「聰明仔」去到九龍公園已經換咗衫，本來佢着住件深灰色曼聯Tee，到九龍公園已換咗件黑色Tee，之後佢去小食店，又已換咗件淺灰色衫，兩粒鐘換三件衫，真係勁貪靚！
「聰明仔」喺小食店就變「大食仔」，狂食地道雞蛋仔同咖喱魚蛋，佢好似勁鍾意食，流露出開心笑容。可能係湯卡華利出道時間尚淺，食店老闆認唔出呢名曼聯球星，但當介紹之後，老闆就非常興奮，要求「聰明仔」喺佢着住作恤衫背面簽名。據悉，湯卡華利前日到港，夜晚因時差問題，到昨日凌晨兩點幾仲眼光光瞓唔着，但佢仲係好親民，對食店老闆有求必應，又簽名又合照，完全冇球星架子。
「聰明仔」自由行
11:00am 離開酒店行海防道街市
11:45am 遊覽尖沙咀鐘樓
12:30pm 九龍公園小型足球場與傑志青年軍交流
1:00pm 品嘗美食咖喱魚蛋雞蛋仔
1:45pm 回酒店休息
4:00pm 旺角麥花臣足球場指導青年球員及示範
5:00pm 花園街Nike Football店會球迷及接受訪問
8:00pm 回酒店及晚膳
及後往機場乘凌晨航機離港