費Sir退休陪老婆

曼聯傳奇名帥費格遜，其奧脫福最後之夜由里奧費迪南尾段射死史雲斯贏二比一作結，現場球迷高唱「We love you, Fergie」，仲砌出巨型20號，紀念曼聯廿奪頂級聯賽冠軍。奧脫福隨即舉行盛大慶祝頒獎禮，呢位主角率領職球員捧盃，並深情親吻人生最後一個英超冠軍。費格遜家族加入慶祝隊伍行列，佢三個仔合共生咗十一隻化骨龍，呢隊費格遜乖孫兵團着住印有爺爺（Grandad）嘅曼聯波衫，仲同費Sir大合照，溫情洋溢。

踢爆朗尼「反骨」為莫帥拆彈

有關費格遜退休原因眾說紛紜，有人話佢出現健康問題，亦有指被老細格拉沙勸退，佢賽後親自解畫：「我其實喺上年聖誕決定退休，Cathy嘅家姐過咗身後，所有嘢唔同晒，佢失去咗最好嘅朋友，變得好孤單。過去四十七年，佢都係一家之主，一個人照顧三個仔，為我犧牲好多，佢依家有成班乖孫喇！我希望以勝利者姿態告別，呢點對我好重要。」

乖孫Eleven 費Sir嘅11個乖孫着晒曼聯波衫，同爺爺影番張告別奧脫福大合照。（Getty Images圖片）	老費同過氣契仔朗尼感情轉淡，告別毫無激情。（美聯社圖片）	奧脫福職員高舉2638嘅後備牌，寓意服務26年奪38個冠軍。（Getty Images圖片）

費Sir六六年同Cathy結婚，為事業冷落妻子，如今奠定英倫傳奇名帥地位，終為太太放下教鞭。費格遜向現場球迷發表告別演說，表明唔係「裸退」，同時呼籲fans力撐新帥。佢仲話難忘同所有曼聯成員一齊經歷嘅絕殺球、挫敗同美好時光。

最後一次領取英超冠軍獎牌。（Getty Images圖片）	費格遜喺乖孫陪伴下同球迷揮手，場面溫馨。（Getty Images圖片）	曼聯影威水相，里奧費迪南狂噴香檳搞氣氛。（Getty Images圖片）

費Sir臨別前仲揪出反骨仔，大爆朗尼要求離隊：「朗尼提出咗轉會要求，我諗佢今場都唔想踢，我希望佢自己諗清楚啦，因為球會係唔會放人！」朗尼今場不入大軍名單，賽後佢喺頒獎禮同老費碰頭齋握手，並冇擁抱，兩師徒關係冷淡，但費爵爺強調賣人權唔在佢手上。眾所周知，朗尼同曼聯候任主帥莫耶斯素有心病，老費今次罕有高調爆朗尼想跳槽，相信係想幫莫帥拆彈，希望帥位交接可以順利進行。

告別感言全文

在我的腦子裏絕對沒有演講稿，所以我只能隨便說說，希望我能總結好。

首先，我要感謝曼聯，不只是球會董事、醫務人員、教練團、球員同球迷，我要感謝所有人，你們一直是我生命中的美妙經歷，多謝。

我一直很幸運，可以執教一些在這個國家最優秀的球員，更不用說執教曼聯了。今天所有在這裏的球員都代表了球會正確的運作模式，他們在一個夢幻般的時刻贏了冠軍，做得好，球員們。

我的退休不代表與曼聯關係結束，我可以用享受的角度欣賞他們比賽，而不需要跟球員一起煎熬。如果你能想到這一點，那些絕殺、反敗為勝、甚至輸波都是這間偉大球會的一部分，現在球會是讓人難以置信，為此要多謝你們。

我還想提醒大家，當我們成績差的時候，球會、工作人員、球員同球迷都一直支持我，現在你們要做的，就是去支持新領隊。

在我開始流淚前，我想向今天退休的史高斯致敬，他是令人難以置信的，是曼聯最偉大的球員之一，他這樣的類型，以前球會沒有，以後也可能沒有，希望你退休後有好生活，我也希望費查可以早日康復。

各位球員，我希望你們每一個都能成功，你知道自己有多麼優越，你知道穿起曼聯球衣代表甚麼，不要令人失望，在這裏，期待永遠存在。好了，我要回家了，我代表費格遜家族再次多謝各位，謝謝！