王晨唔會做辣媽
王晨拒絕做「嚴媽」！昔日在羽毛球場殺氣騰騰，對手未比賽先忌三分，就算轉任教練那種「霸氣」依然令球員腳震震，然而去年「升呢」做媽媽的羽毛球壇明星王晨，對住乖仔「龍龍」就「投降」，一向愛贏的她更自稱是輸家，即使老人家說「棒下出孝兒」，但她強調不會嚴打、不會施壓，只讓愛兒開心成長！今日與「龍龍」度過首個母親節，王晨坦言「簡單是福」，並祝願天下媽媽母親節快樂！
訪問當天，難得到訪王晨家，滿屋擺放的並不是她征戰多年的戰利品，而是嬰兒用品及一堆堆玩具，昔日球場上的「烈女」抱着囝囝鄭星駿笑不攏咀，一邊做訪問一邊與愛兒玩樂：「我哋叫佢龍龍，因為佢喺龍年出世，佢好鍾意人按佢個肚Dumpo架！」抱着「龍龍」又呵又錫的王晨，盡露母性一面，她表示自己以前不喜歡孩子，但因為覺得一個家始終要有小朋友，才考慮生B；直至囝囝出世、首次抱着他的時候，才感覺到那份溫馨：「坦白講，未生之前我唔鍾意細路仔，因為小朋友好煩，我本身係冇耐性嘅人，即使我生完嗰刻都冇乜感覺，冇第一時間睇佢，醫生叫我幾次抱佢餵奶，結果第二日先餵佢，但抱上手餵奶嗰陣，感覺好特別、好親切，嗰一刻真係feel到乜嘢叫母愛。」
教仔有法唔係靠嚴
強悍、不服輸一直是王晨個性，但面對着好動的「龍龍」很多時都變成輸家：「朋友常笑『終於有人治到你』，我一直覺得呢個世界冇嘢可怕，冇嘢係特別難，但對住細細個人仔，鬧佢、佢唔識，打又唔得、會心痛，有時真係冇辦法。」你會是「嚴媽」嗎？王晨斬釘截鐵表示：「不會！我會做慈媽，佢爸爸成日話我『慈母多敗兒』，我估自己會寵他，絕對唔會打。」坐在旁邊的老公鄭昱閩亦「搭嘴」：「點解要嚴？教小朋友唔一定要打，睇吓點樣教。」事實上，當媽媽之後，王晨性格也轉變不少，鄭昱閩亦覺得兩公婆多咗愛心。
開心成長最重要
「龍龍」現在已經10個月大，很多香港家長已經為孩子想將來，搵Playgroup、找學校，但在王晨的時間表中並沒有為阿B計劃：「太誇張喇！坦白講我依家真係冇計劃，我唔想咁快畀壓力佢，我想佢開心、健康成長。」「龍龍爸」即補充：「我覺得依家香港嘅小朋友好辛苦，功課多又要參加課外活動，相比起我家姐兩個女喺澳洲讀書不知幾開心。」不過，王晨初步計劃都會讓「龍龍」在港升學，若愛兒真是遇上太大壓力才會考慮讓他出國讀書。
文：李芷韻