人哋娶個老婆愛嚟錫，呢班體壇衰公就愛嚟打！近期體壇掀起一片腥風血雨，「刀片跑手」比托利斯涉嫌槍殺女友、前富咸後防彭素爾就擸刀捅女友隻眼，真係講起都覺得恐怖。而喺體壇中一樣有唔少「家暴男」存在，佢哋當老婆或女朋友係沙包拳打腳踢，同佢哋嘅運動員形象完全背道而馳。專家解釋話一來體壇競爭殘酷，運動員心理壓力大，加上出名嘅運動明星身家豐厚，又係被崇拜嘅偶像，因此每當遇到唔順心嘅時候，就好易將潛藏嘅大男人主義藉住暴力行為發洩出嚟，而作為佢哋另一半就自然首當其衝，成為家暴嘅受害者。今日就逐一數臭呢班體壇衰公！
呢位曾効力利物浦、馬賽，現被昆士柏流浪外借去卡塔爾球隊艾加拉法嘅射手，你睇佢個樣兇神惡煞、神神化化，喺街頭見到佢，就應該即刻躲去街尾。而佢成名之後有鋪打人癮，試過喺夜店打過女人，仲連懷孕太太都唔放過！
05年施斯同髮型師Jude結婚，點知施斯好快就露出狐狸尾巴，翌年竟然向老婆拳打腳踢，當時佢太太已經有咗BB，真係聽到都覺得慘。事件驚動到警方，不過因為Jude仍深愛呢個衰佬，最後竟然大事化小、小事化無。隨後Jude仲生多兩件，認真賢良淑德。不過施斯最後都因搭上英國潮服太子女，舊年決定拋棄Jude，真係衰公中嘅衰公。
施斯(法國/艾加拉法前鋒)
衰公指數：★★★★★
肯尼亞「氣袋」萬吉魯，本身係馬拉松界天王級人物，於08年京奧以破奧運紀錄勇奪馬拉松金牌。不過佢私底下卻唔當老婆係人，打老婆只係家常便飯，最離譜嗰次仲試過用槍指住太太個頭。
終年24歲嘅萬吉魯，私生活可謂一塌糊塗，2011年前佢背妻帶咗個女人返屋企鬼混，點知被撞破，佢老婆盛怒之下將對狗男女反鎖喺2樓臥室，自己就離開屋企。萬吉魯唔認衰不特止，仲唔忿氣喪鬧太太，火都嚟埋下試圖從二樓跳落地下追打老婆，點知就咁跌死咗。雖然馬拉松界損失一顆明星，但老實講有咁嘅下場全都係萬吉魯自己攞嚟。
萬吉魯(肯尼亞/08京奧馬拉松金牌)
衰公指數：★★★★★
雲達華治背妻偷食，一巴摑散8年婚姻，呢位荷蘭國腳喺剛過去嘅新年聖誕派對，當眾掌摑明星老婆施維爾，後者掟酒樽還擊，最終分居收場，據聞令呢段童話式婚姻破滅，係因為雲達華治搭上施維爾嘅閨中密友Nikkie Plessen。
雲達華治同施維爾被譽為荷蘭版碧咸及維多利亞，05年結婚嗰陣有140萬荷蘭人透過電視直播見證，09年施維爾患乳癌，雲達華治亦堅持陪伴左右，估唔到經唔起第三者介入。但亦有傳聞指施維爾結識咗女星伊娃朗歌麗亞，二人經常結伴夜蒲，冷落老公，令雲達華治不滿而郁手打老婆，總之就係家家有本難念的經喺啦！
雲達華治(荷蘭/漢堡中場)
衰公指數：★★★★
已故嘅曼聯傳奇球星佐治貝斯，直言一生人離唔開女人同劈酒，佢嗜酒如命，晚年酗酒情況嚴重，一飲醉就會搵老婆艾歷絲出氣，試過喺03年打到老婆入醫院，狼死都爆，冇品到咁，幾好波都冇用！
03年拆禮物日一名57歲男子涉嫌打老婆被捕，虐妻案男主角就係佐治貝斯，艾歷絲受訪時話只想度過快樂聖誕，點知個衰公飲到醉醺醺郁手郁腳，佢嘴唇被打腫，身上有明顯瘀傷，艾歷絲話仲試過畀老公兜心口咁踢，貝斯腳頭咁重，食佢一腳都咪話唔陰功。不過，佐治貝斯雖認時常同老婆嗌交，但否認有郁手喎。唓！嗰陣佢飲大咗，又點會記得先？
佐治貝斯(北愛爾蘭/前曼聯翼鋒)
衰公指數：★★★★
曾經効力車仔、皇馬嘅前法國國腳馬基列尼，喺場上表現勇悍，因此贏得「鐵腰」稱號，估唔到返到屋企卻變身「拳王」。2010年佢喺巴黎市郊屋企拳打前女友Ojeer，拳拳到肉當佢沙包咁打，不過打還打，最無恥係馬基列尼係咁打佢塊面，搞到人哋變咗豬頭，都唔知點見人，於是決定打官司想告到個衰佬甩褲。
雖然馬基列尼嘅代表律師喺庭上承認二人曾發生爭執及身體碰撞，但辯稱只係保護自己，最終獲判無罪甩身，可憐Ojeer得唔到賠償之餘，仲因為提出冇事實根據嘅訴訟而輸埋堂費，試問天理何在？
馬基列尼(法國/前皇馬、車路士中場)
衰公指數：★★★★
英國桌球天王奧蘇里雲於09年因涉及一宗家庭暴力事件，被警方拘留9小時。據悉綽號「火箭」嘅奧蘇里雲返家諗住同子女及妻子歡度聖誕節，點知突然同妻子發生爭執，兩夫妻更大打出手，最後要勞煩警察到來調停事件。
警方表示奧蘇里雲太太的確受傷，亦帶走「火箭」到警署問話。最衰係奧蘇里雲敢做唔敢認，對記者講唔知大家問乜。其實佢於記者會時，臉上留有明顯被抓傷痕迹。當被記者問及傷痕何來時，奧蘇里雲就扮失憶。問佢太太去咗邊時就繼續扮傻，叫記者打電話畀佢，真係冇品到爆。
奧蘇里雲(英國/4屆桌球世界冠軍)
衰公指數：★★★
曼聯嘅英格蘭前鋒朗尼，06年畀英國《太陽報》同《世界新聞報》指佢同當時女友麥露蓮同其他朋友落柴郡一間高級娛樂場所消遣時，發脾氣摑咗麥露蓮一巴。
知情人士話朗尼當時唔開心，想向麥露蓮呻吓，點知麥露蓮淨係掛住應酬朋友冇理佢，於是朗尼就借勢發火。據講朗尼同麥露蓮初時只係嗌交，但之後愈鬧愈激，朗尼最後仲冚咗麥露蓮一巴。二人事後透過發言人承認佢哋有爭執，但就冇嗌交同郁手，及後朗尼更控告呢兩份報紙誹謗，最後勝訴獲賠償10萬鎊（約125萬港元），事後朗尼將所有錢都捐晒畀慈善機構。
朗 尼(英格蘭/曼聯前鋒)
衰公指數：★★★
現時効力紐約人的後衞傑特曾被稱為好好先生，但有時佢都會展示暴力一面。多年前傑特嫂有日去玩健身唔得閒餵囝囝食飯，叫傑特幫手，點知佢竟然食咗囝囝的食物，老婆見到話佢兩句，佢竟然老羞成怒，即時將食物吐喺老婆面上，更送上力道十足嘅一巴掌。
不過有指傑特其實係忍唔住還拖，事關佢老婆都一向相當霸道，經常郁手打老公，最變態嘅係佢會偷睇傑特電腦同喺佢嘅車上安裝追蹤器，又騷擾過傑特的訓練師、隊友和親人，忍無可忍嘅傑特終喺07年主動向法庭申請離婚。
傑特(美國/NBA紐約人後衞)
衰公指數：★★
前NBA球星艾佛遜私底下係一名醋男子，雖然佢同老婆青梅竹馬，婚後生咗兩個細路，但就成日懷疑另一半對佢不忠，試過有一次老婆夜咗返屋企，令佢起咗綠帽疑雲，一怒之下打咗老婆一身，仲剝晒佢啲衫，赤裸裸咁將佢掟出街，離譜到暈。
女方受辱去住酒店，艾佛遜竟然揸槍去懷疑係「姦夫」嘅朋友屋企搵人，仲出言威嚇要殺人，結果被警方拘捕，而佢更因為無牌藏槍、持械襲擊同恐嚇等罪名被起訴，好彩最後打甩罰錢了事，否則隨時要踎50年監，而兩夫妻之間呢條裂痕亦永遠無法修補。
艾佛遜(美國/前NBA球星)
衰公指數：★★★★
撰文：吳浩然