跟住阿Sa舞走拜拜肉
今集《萌星動起來》請嚟蔡卓妍（阿Sa）玩運動，佢話自己年紀唔細，開始要靠做運動抗衰老！於是就決定搵嚟兩位Hip Hop舞蹈達人Eddy及小婷，向呢位天后傳授一套可收緊肌肉線條嘅「J-Pop Style」健體舞adidas dance，啱晒活力十足又不失性感可愛嘅阿Sa！
問到平日紮紮跳、冇時停嘅阿Sa有冇做運動習慣，佢直情話自己係同運動分唔開：「我自細跳咗芭蕾舞10年，讀中學時又係田徑隊，所以做運動喺我生命中相當重要！須知道女仔年紀愈大就開始會有『拜拜肉』，所以依家要靠跳舞嚟收緊番啲肌肉，同時又可以修靚身形線條，扭多幾吓可以令你應該大嘅地方變大、應該修嘅地方就修，咁就最啱我！」
節拍輕快 運動量高
今次擔任阿Sa跳舞老師嘅係Eddy同埋小婷，佢兩位係Hip Hop舞高手就不在話下，前排仲獲邀到日本，跟全球60幾位頂尖舞者一齊學習adidas dance呢種「J-Pop Style」健康舞。由於呢種富有日本街頭元素嘅舞蹈着重Keep Fit、瘦身，運動量相當之高，絕對符合阿Sa嘅需要。
Dancers姊妹齊癲減壓
不過，當阿Sa同埋佢班「Girl Tribe」舞蹈員學過「J-Pop Style」之後，呢位樂壇天后就發現另一好玩之處：「其實以組合身份出道嘅我，一直都慣咗同成班姊妹一齊癲、一齊玩，又鍾意熱鬧。跳呢隻舞時節奏輕快、充滿動感，加埋同班Dancers姊妹一齊跳得好開心兼玩得癲，可以大大紓緩工作壓力。」阿Sa仲話嚟緊會返內地參加一個舞蹈節目，到時會着起高跟鞋、扭來扭去跳拉丁舞，所以今次學跳「J-Pop Style」，絕對係最好嘅熱身運動！
圖、文：司徒子文
服裝：adidas